बाह्र सय नेपाली काठमाडौं आउँदै, कुवेतबाट १८ सय ६९ जना स्वदेश फिर्ता

काठमाडौं।

शुक्रबार एक हजार दुई सय नेपाली काठमाडौं आउँदैछन्। विदेशमा अलपत्र नेपाली नागरिकको उद्दार गर्ने क्रममा बहराइन, युएई, कुवेत र मलेसियामा समस्यामा परेका नेपाली आउन लागेका हुन्। कुवेतबाहेक सबै मुलुकबाट शुक्रबार दुई/दुई वटा उडान हुँदैछन्। बहराइनको दुवै र मलेसियाको एउटा उडान नेपाल एयरलाइन्सको जहाजमार्फत हुँदैछ।

युएईको हिमालयन र एयर अरेविया, कुवेतको जजिरा एयरलाइन्स र मलेसियाको एउटा उडान हिमालय एयरलाइन्सबाट हुँदैछ ।

उनीहरुलाई नेपाल ल्याएर काठमाडौं, भक्तपुर र ललितपुरमा राखिएका होल्डिङ सेन्टरमा लगिनेछ। त्यहाँ सेनाको व्यवस्थापनमा उनीहरुको सामान्य स्वाथ्य जाँच र विवरण लिने कार्य हुनेछ। त्यसपछि सम्बन्धित प्रदेशमा क्वारेन्टिनमा बस्ने गरी पठाइनेछ।

विदेशबाट आउने नागरिकले पीसीआर रिपोर्ट ल्याएको खण्डमा उनीहरुले होम क्वारेन्टिनमा बस्न पाउनेछन्। इच्छुकले होटल क्वारेन्टिनमा पनि बस्न पाउनेछन्।

कुवेतबाट अहिलेसम्म १२ उडानमार्फत १८ सय ६९ जना स्वदेश फिर्ता

कुवेतबाट अहिलेसम्म १२ उडानमार्फत १८ सय ६९ जना स्वदेश फर्किसकेको कुवेतस्थित नेपाली दूतावासले जानकारी दिएको छ। दूतावासका अनुसार अहिलेसम्म  नेपाल एयरलाइन्स र हिमालय एयरलाइन्सले एक/एक उडानमार्फत ३०४ जना र कुवेतको जजिरा एअरको १० उडान गरी जम्मा १८ सय ६९ जना स्वदेश फर्किसकेका छन्।

जजिरा एअरमार्फत कुवेत सरकारले भिसा उल्लङ्घन गर्नेका लागि घोषणा गरेको आममाफी कार्यक्रममा सहभागी भएकालाई १० वटा उडानमार्फत स्वदेश फर्काइएको दूतावासले जनाएको छ। आममाफीमा सहभागी करिव तीन हजार रहेको र बाँकीलाई पनि कुवेत सरकारले क्रमश: सबैलाई स्वदेश पठाई रहेको छ।
आममाफी बाहेक कोरोनाका कारण समस्यामा परेका नेपालीलाई  दुईवटा चार्टर्ड उडानमार्फत स्वदेश पठाएको दूतावासले जनाएको छ।
स्वदेश फर्कनैपर्ने अवस्थामा रहेका गर्भवती, कोरोना बाहेकका गम्भीर रोगका बिरामी, काजकिरियाका लागि फर्कन पर्नेहरु, अपांगता भएकालगायतका व्यक्तिलाई प्राथमिकतामा राखेर स्वदेश पठाएको दूतावासले जनाएको छ।
समस्यामा परेका नेपालीको स्वदेश फिर्तीको लागि सहजीकरण र बिदाई गर्न कुवेतका लागि नेपाली राजदूत दुर्गाप्रसाद भण्डारी आफैं विमानस्थल पुगेका थिए। आज पनि आममाफी पाएका एक सय ५० जना नेपाली फर्कदै छन्।
कतारबाट फर्कनका लागि फाराम भरेकाहरु नामावली सार्वजनिक
नेपाल फर्कनका लागि जुन १२ देखि २५ सम्म फाराम भरेका थप नामावली सार्वजनिक गरेको छ। कोरोना भाइरस लगायत अन्य कारणले रोजगारी गुमाई  समस्यामा परी स्वदेश फर्किनका कतारस्थित नेपाली दूतावासले उपलब्ध गराएको दर्ता फाराम भरेर तथा अन्य माध्यमबाट समस्या टिपाएका दोश्रो चरणको नामावली दूतावास प्रकाशन गरेको छ।
१ हजार ९ सय ३१ नेपालीको नामावली सार्वजनिक गरेको छ। यी मध्ये प्राथमिकतामा आधारमा नेपालीहरुको छनोट गरी उडान तय गरिने दूतावासले जनाएको छ । उक्त सूचिमध्ये प्राथमिकतामा पर्ने नागरिकहरुलाई दूतावासले सूचनामार्फत वा प्रत्यक्ष रुपमा आफै सम्पर्क गर्नेछ।
यसअघि दुतावासले नेपाल फर्कनै पर्ने नेपालीहरुको विवरण (११ जून २०२० सम्म प्राप्त) लाई आधार मानी ५११२ जनाको नाम सार्वजनिक गरेको थियो । अहिले नामावली प्रकाशन गरेकाहरुको अहिले उडान भैरहेको छ।
अब अर्को उडान २७ जुन अर्थात् असार १३ गते नेपाल एयरलाइन्स मार्फत हुने छ भने उक्त उडानबाट समस्यामा परेका १७४ जना नेपालीको सूची दूतावासले सार्वजनिक गरिसकेको छ । दूतावासका अनुसार नेपाल एयरलाइन्सले २९ र ३० जुनकाे उडान गर्ने छ।
तेश्रो र चौथो उडानका लागि संलग्न सूचीमा नाम भएका व्यक्तिहरुले उक्त एयरलाइन्सको देहायको आधिकारिक ट्राभल एजेन्सीमा सम्पर्क गर्नुहुन सम्बन्धित सबैलाई अनुरोध गरिएको दूतावासले जनाएको छ । अहिलेसम्म कतारबाट आममाफी पाएका ४३ सहित ४ सय ९५ जना र २० वटा शव नेपाल पुगिसकेको छ।
कुवेतमा एक नेपालीको मृत्यु 
रोजगारीको सिलसिलामा कुवेतमा कार्यरत रहेका  सिन्धुपाल्चोकका बिश्व कुमार श्रेष्ठको उपचारको क्रममा मृत्यु भएको छ। विगत लामो समयदेखी कुवेतमा काम गर्दै आएका उनको उपचारको क्रममा फर्वानिया अस्पतालमा मृत्यु भएको कुवेतस्थित नेपाली दूतावास स्रोतले जनाएको छ।
कुवेतमा बसेर अबैधानिक रूपमा काम गर्दै आएका उनको मृत्यु भएपछि आवश्यक पकृया पुर्याएर शवलाई नेपाल पठाउने तयारी भैरहेको दूतावास जनाएको छ। मृतक श्रेष्ठको श्रीमती पनि कुवेतमै रहेको जानकारी प्राप्त भएको छ भने घरमा एक छोरा र एक छोरी रहेका छन्।