छिट्टै सार्वजनिक सवारीसाधन चलाउँछौँ -यातायात व्यवसायी

काठमाडौं।

मौद्रिक नीतिले आफूहरुका धेरैजसो माग सम्बोधन गरेको भन्दै केही दिनभित्रै सार्वजनिक सवारी चलाउने यातायात व्यवसायीले बताएका छन्। नेपाल यातायात व्यवसायी राष्ट्रिय महासंघका महासचिव सरोज सिटौलाले २-३ दिनभित्रै सार्वजनिक सवारीहरु चलाउनेबारे निर्णय हुने बताए। बैंकको किस्ता सार्नुपर्ने, सुहलियत ब्याजदरको पुनर्कर्जा दिनुपर्ने लगायत व्यवसायीका माग समेटिएकोमा खुसी हुँदै बस चलाउने योजनमा रहेका बताइएको छ।

सरकारले गत असार २६ गतेबाट जिल्लाभित्र र काठमाडौं उपत्यकाभित्रको सार्वजनिक सवारी खुला गरेको थियो। यातायात व्यवसायीका छाता संगठनहरुले बस नचलाउने निर्णय गरेकाले अधिकांश यातायात कम्पनीले अझै सेवा सुरु गर्न सकेका छैनन्।

सरकारले सवारी सञ्चालन गर्दा अपनाउनुपर्ने मापदण्डबारे थप स्पष्ट गर्नासाथ सबै कम्पनीहरूले सवारी चलाउने महासचिव सिटौलाले बताए। अहिले साझा, मयूर, महानगर, संयुक्त, सुन्दर लगायतका बस सेवा संञ्चालनमा रहेका छन्।

अन्य सम्बन्धित समाचार:  विप्लव पक्षसँग वार्ता भएको छिट्टै टिभीमा देख्नुहुनेछः प्रधानमन्त्री ओली