सन्दीप लामिछाने सीपीएल खेल्न ट्रिनिडाड एन्ड टोबागो जाँदै

Prabhu Bank

काठमाडाैँ।

Saftey Pads

सन्दीप लामिछाने क्यारेबियन प्रिमियर लिग (सीपीएल) खेल्न बिहीबार ट्रिनिडाड एन्ड टोबागो जाने भएका छन्। कोरियन एयरको चार्टर्ड जहाजमा सन्दीप टोबागो जान लागेको उनका व्यवस्थापक रमन सिवाकोटीले जानकारी दिए। यसअघि हवाई उडानको यकिन नहुँदा उनी टोबागो जानेबारे अन्योल थियो। “बिहीबार उड्ने पक्कापक्की छ, अब कुनै द्विविधा छैन”, सिवाकोटीले भने। सरकार र अन्य विभिन्न निकायबाट सहयोग प्राप्त भएपछि सन्दीप टोबागो जान सहज भएको उनले बताए।

जानुअघि पीसीआर परीक्षण

टोबागो उड्नुअघि उनले मङ्गलबार पीसीआर परीक्षण गराएका छन्। सन्दीपले सानेपास्थित स्टार हस्पिटलमा स्वाब परीक्षणका लागि दिएका छन्। परीक्षणको नतिजा आज आउने बताउँदै व्यवस्थापक शिवाकोटीले सीपीएल खेल्नका लागि सन्दीप साउन १७ गतेसम्म पुगिसक्नु पर्ने जानकारी दिए। सरकारले अन्तर्राष्ट्रिय हवाई उडान आगामी भदौ १ गतेदेखि मात्र खोल्ने निर्णय गरेपछि सन्दीपलाई क्रिकेट खेल्नका लागि विदेश जान समस्या भएको थियो। सरकारले सहयोग गरेकै कारण सन्दीपको टोबागो यात्रा सहज भएको हो।

टोबागो पुगेर १४ दिन क्वारेन्टाइनमा बस्नु पर्ने

उनले टोबागो पुगिसकेपछि १४ दिन क्वारेन्टाइनमा बस्नु पर्नेछ। सन्दीप यस यामको सीपीएलका लागि जमैका तल्लावाहजबाट अनुबन्धित भइसकेका छन्। उनलाई जमैका तल्हावासले एक लाख ३० हजार अमेरिकी डलर (एक करोड ५६ लाख रुपैयाँ) मा मार्की खेलाडीकाे रुपमा अनुबन्ध गरेको हो। सन्दीपले यसअघि पहिलो र दोस्रो संस्करणको सीपीएल खेलिसकेका छन्। सीपीएल आगामी भदौ २ देखि भदौ २५ गतेसम्म चल्नेछ। कूल ३३ खेल हुने सीपीएलमा जमैकासँगै बार्बाडोस् ट्रिडेन्ट्स, ट्रिनबागो नाइट राइडर्स, गाएना अमेजन वारियर्स, सेन्ट लुसिया जौउक्स र सेन्ट किट्स एन्ड नेभिस प्याट्रिओट्सले प्रतिस्पर्धा गर्नेछन्।

दर्शकविनाकाे खेल हुने 

कोरोना भाइरसका कारण ती सबै खेल विनादर्शक खेलाइनेछन्। सन्दीप तेस्रोपटक सीपीएल खेल्ने तयारीमा छन्। उनले यसअघि सन् २०१८ मा पहिलोपटक सेन्ट किट्स एन्ड नेभिस पेट्रियट्सबाट खेलेका थिए। त्यसका लागि उनलाई पाँच हजार अमेरिकी डलर पारिश्रमिक दिइएको थियो। उनले सो प्रतियोगितामा पाँच खेलमा सात विकेट लिएका थिए। यस्तै दोस्रोपटक सीपीएल सन्दीपले सन् २०१९ मा बार्बाडोस ट्रिडेन्ट्सबाट खेलेकामा उनले ६ खेलमा आठ विकेट लिएका थिए। सन्दीपले गत वर्ष ७० हजार अमेरिकी डलर पारिश्रमिक प्राप्त गरेका थिए। यस वर्षको सीपीएलका लागि १९ वर्षीय सन्दीपले आफ्नो अनुबन्धित मूल्य ९० हजार अमेरिकी डलर तोके पनि उनलाई एक लाख ३० हजार डलर दिने सम्झौता भएको छ।

अन्य सम्बन्धित समाचार:  तीन पाकिस्तानी खेलाडीको पदक खोसियो
Maruti Cement