सन्दीप आवद्ध जमैका सीपीएलको सेमिफाइनलमा

काठमाडौँ। नेपाली खेलाडी सन्दीप लामिछानेआवद्ध जमैका तलावाज क्यारेबियन प्रिमियर लिग (सिपिएल) टी २० क्रिकेटको सेमिफाइनलमा पुगेको छ।

शुक्रबार बिहान सम्पन्न खेलमा गुयाना अमेजन वारियर्सले बारबाडोस ट्रिडेन्ट्सलाई ६ विकेटले पराजित गरेपछि जमैका आफ्नो खेल्न दुई खेल अगावै सेमिफाइनल पुग्न सफल भएको हो।

यसअघि सन्दीपको टोली जमैकाको बिहीबार राति सेन्ट किट्स एण्ड नेभिस प्याट्रिओट्ससितको खेल भने वर्षाका कारण रद्द भएको थियो। उक्त खेलमा दुवै टोलीले एक एक अंक बाँड्न बाध्य भए।

तीन अंकमा सिमित सेन्ट किट्स प्रतियोगिताबाट बाहिरिएको छ। उसले हालसम्म नौ खेलमा एकमा जित तथा आठमा पराजय भोगेको छ। जमैका हालसम्म आठ खेलमा तीनमा जितका साथ सात अंकसहित चौथो स्थानमा छ।

अन्य सम्बन्धित समाचार:  प्रचण्डले लगाए कोरोनाविरुद्दको खोप

लिगमा शतप्रतिशत नतिजा निकाल्न सफल ट्रिनबागो नाइट राइडर्सले १६ अंक बनाउँदै यसअघि नै सेमिफाइनल पुगिसकेको छ। उसले दुई खेल खेल्न अझै बाँकी छ।

लिगमा सबै खेल खेलिसकेको गुयाना अमेजन वारियर्स हालसम्म १० खेलमा ६ मा जितका साथ १२ अंक बनाएर अन्तिम चारमा स्थान बनाउन सफल भएको छ।

यस्तै सेन्ट लुसिया जुक्स पनि सेमिफाइनलमा पुगिसकेको छ। उसले हालसम्म आड खेलमा पाँचमा जित निकाल्दै १० अंक जोडेको छ। साविक विजेता बारबाडोस ट्रिडेन्ट्स भने नौ खेलमध्ये दुईमा मात्र विजयी भई चार अंकका साथ प्रतियोगिताबाट बाहिरिएको छ।