मनिषाकाे चर्चित पुस्तक ‘हिल्ड’ अब नेपालीमा

काठमाडाै‌।

अभिनेत्री मनिषा कोइरालाले लेखेकाे चर्चित पुस्तक ‘हिल्ड’ को नेपाली अनुवाद गरिएको छ। पत्रकार स्वरूप आचार्यले अनुवाद गरेकाे पुस्तक फाइनप्रिन्टले प्रकाशन गरेकाे हाे। ‘हिल्ड’ को नेपाली अनुवादलाई ‘जिजीविषा’ नाम दिइएको छ।

अमेरिकामा क्यान्सर उपचारका क्रममा एक जना बौद्ध रिन्पोचेले क्यान्सरले सताइरहेकाे समयका कुरा टिपोट गरिराख्नू भनेकै कारण आफूले पुस्तक लेखेकाे मनिषाले पुस्तक सार्वजनिक कार्यक्रममा बताइन्।

क्यान्सर लागेपछि भोगेका कुरा, त्यसबाट प्राप्त ज्ञानलाई किताबमा लेखेर समाजलाई पस्कने हेतुले पुस्तक लेखेको उनको भनाइ छ। धेरैले ‘ग्ल्यामरस लाइफ’ मा दुःख हुन्न भन्ने सोच्ने गरेकाे बताउँदै मनिषाले आफूले असाध्यै जटिल परिस्थितिलाई नजिकबाट झेलेकाे उल्लेख गरेकी छिन्।

उनले धेरैजसो मानिसको चाहना आफ्नो जीवनको ‘पर्फेक्सन’ मात्र देखाउने भए पनि आफूले भने यस पुस्तकमा ‘पर्फेक्सन’ भन्दा पनि ‘जीवनको तीतो सत्य’ भन्न खाेजेकाे बताइन्। क्यान्सर लाग्नुअघि आफूले जीवनको त्यति महत्व नबुझेको र पछि मृत्युको नजिक पुग्दा यसको महत्त्वबारे धेरै जानकारी पाएको उनले अभिव्यक्त गरिन्।

मनिषाका उक्त पुस्तकहरु ‘हिल्ड’ अमेजन मा र  त्यसको नेपाली अनुवाद ‘जिजीविषा’ फाइनप्रिन्ट मा उपलब्ध छन्।