केपी ओली तानाशाह बन्ने तरखरमा रहेकाे उपेन्द्र यादवकाे आराेप

पर्सा। जनता समाजवादी पार्टी (जसपा)का अध्यक्ष उपेन्द्र यादवले ओलीतन्त्रको अन्त्य भए पछि नै लोकतन्त्रको रक्षा हुने बताएका छन्।वीरगञ्जमा पार्टीले सोमबार आयोजना गरेको जनप्रदर्शन एवं विरोध कार्यक्रममा बोल्दै नेता यादवले ओली सरकारमा रहेसम्म लोकतन्त्रमाथि खतरा हुने उल्लेख गरे।

बहुमतको सरकार आएपछि आर्थिक विकास, किसान मजदुरको राम्रो दिन आयो भन्ने सोचेका थियौं, तर सरकारले रासायनिक मलको समेत व्यवस्था गर्न सकेन। उखु किसान चिसोमा काठमाडौंमा प्रदर्शन गर्न बाध्य भए,’ उनले भने, ‘ओलीले पार्टी तोड्न, संवैधानिक आयोग कब्जा गर्न अध्यादेशबाट देश चलाउन खोजे, ओली सरकार रहेसम्म लोकतन्त्रमा खतरा रहन्छ।’

उनले ओली संविधान नै खारेज गरेर तानाशाही बन्ने तरखरमा रहेको बताउँदै त्यो सपना पूरा हुन दिन नहुने बताए। प्रधानमन्त्रीले नै न्यायलय र पूर्वप्रधान न्यायाधीशहरुलाई धम्की दिइरहेको उनको भनाइ छ ।