निर्वाचनको तयारीमा जुट्न प्रहरीलाई गृहमन्त्रीको निर्देशन

काठमाडौं। गृहमन्त्री रामबहादुर थापा बादलले वैशाखमा हुने मध्यावधि निर्वाचनको तयारीमा जुट्न सशस्त्र प्रहरी बललाई निर्देशन दिएका छन्।

प्रहरी वरिष्ठ उपरीक्षक (एसएसपी) बाट प्रहरी नायव महानिरीक्षक (डीआईजी)मा बढुवा भएका अधिकृतहरूलाई मंगलबार गृह मन्त्रालयमा बधाई तथा शुभकामना दिँदै गृहमन्त्री थापाले निर्वाचनको लागि आवश्यक सुरक्षा योजना बनाउन निर्देशन दिएका हुन्। उनले भने, “स्वच्छ, निष्पक्ष, शान्तिपूर्ण ढंगले निर्वाचन सम्पन्न गर्न तपाईंहरू जुट्नुहोस्, त्यसका लागि आवश्यक स्रोतसाधनको कमी भए मन्त्रालयलाई जानकारी गराउनुहोला, कुनै कमी हुन दिइने छैन।”

शान्ति सुरक्षा, सीमा सुरक्षा तथा विपद् व्यवस्थापनलगायतका क्षेत्रमा सशस्त्र प्रहरीले खेल्दै आएको भूमिकाको प्रशंसा गर्दै गृहमन्त्री थापाले गृहमन्त्रालयले तयार गरेको सुधार कार्ययोजना अनुरूप कामकारबाही अघि बढाउन पनि निर्देशन दिए। “फिल्डमा उच्च मनोबलका साथ काम गर्नुहोस्, तपाईंहरूलाई कुनै चुनौती आए गृह मन्त्रालयबाट सहयोग र संरक्षण हुनेछ,” गृहमन्त्री थापाले भने, “अहिलेसम्मको अनुभवलाई अधिकतम सदुपयोग गर्दै राष्ट्र र जनताको हितलाई केन्द्रमा राखेर काम गर्नुहोस्।”

अन्य सम्बन्धित समाचार:  धनकुटामा नेता रामबहादुर थापालाई विद्यार्थीहरुले कालो झण्डा देखाए