अझै एक साता पानी नपर्ने

पानी

काठमाडौं। यस वर्ष हिउँदयाममा पानी नपर्दा हिउँदे बालीनालीका उत्पादनमा असर पुग्ने भएको छ। गत वर्षको मङ्सिर, पुस र माघमा वर्षा भएको थियो भने यस वर्ष एकपटक पनि पानी परेको छैन।

पश्चिमका केही स्थानमा हल्का पानी परेको भए पनि अन्य ठाउँमा तीन महिनादेखि पानी नपरेको मौसमविद् विभूति पोखरेलले जानकारी दिए। ‘हाल कायम रहेको पश्चिमी वायुको प्रभावले पानी पर्ने सम्भावना कमै रहेको छ,’ उनले भने।

वर्षा हुनका लागि पश्चिमी वायु सक्रिय भई प्राप्त मात्रामा जलवाष्पयुक्त हावा बहनु पर्दछ। अझै एक साता वर्षा हुने सम्भावना नरहेको मौसमविद्को अनुमान  छ। पानी पार्ने उल्लेखनीय मौसमी प्रणाली देशभर नै नरहेको जल तथा मौसम विज्ञान विभागले जनाएको छ।

अन्य सम्बन्धित समाचार:  प्यूठानमा सुत्केरीको मृत्यु

हिउँदयाममा पानी नपरेकाले गहुँ, तोरी, फापरलागयतका बालीमा सुख्खा लागेकाले ५० देखि ७० प्रतिशत उत्पादन घट्ने सम्भावना रहेको वरिष्ठ कृषि विज्ञ डा. केदार बूढाथोकीले बताए। ‘माघ महिनाभित्र पानी परे केही राहत मिल्छ। धेरै नोक्सानी हुँदैन,’ उनले भने। हिउँदे बालीलाई कात्तिक र मङ्सिरमा पानी पर्दा हिउँदे बालीको उत्पादन वृद्धि हुने जनाइएको छ।