कुखुरामा लागेको रानीखेत रोग नियन्त्रण गर्न खोप

हुम्ला। हुम्लाको खार्पुनाथ गाउँपालिकाका–२ थाली गाउँका कुखुरामा लागेको रोग पुष्टि भएको छ। गाउँमा फैलिएको रोगबाट अहिलेसम्म पनि कुखुरा मर्ने क्रम नरोकिएपछि बचेका कुखुराको रक्षाका लागि खोप ल्याइने भएको जनाइएको छ। केही दिन अगाडि मात्रै थाली गाउँमा कुखुरा मर्न थालेको भन्दै स्थानीयद्वारा विभिन्न सञ्चार मिडियामा जानकारी गराएपछि सम्बन्धित पशु सेवा कार्यालयले खोपको व्यवस्था गर्न लागेको हो।

पशु विकास कार्यालयका सूचना अधिकारी कृष्ण रोकायाका अनुसार गाउँमा फैलिएको रोगका बारेमा जानकारी पाउन र शव परीक्षणका लागि जिल्ला पशु सेवा कार्यालय हुम्लाले माघ १२ गते मरेको कुखुरा पशु रोग अन्वेषण प्रयोगशाला वीरेन्द्रनगर सुर्खेतमा पठाएपछि सो कार्यालयले रानीखेत रोग पुष्टि भएको हो। 

कुखुरामा फैलिएको रानीखेत रोगको उपचारका लागि खोपसमेत लिएर अबको केही दिनमा टोली गाउँतर्फ जाने तयारी गरिरहेको सूचना अधिकारी रोकायाले जनाए।  

अन्य सम्बन्धित समाचार:  छ गुणाबढी भाडा लिने सवारी साधन कार्वाहीमा