ताप्लेजुङ आगलागीः पीडितलाई राहत दिन सुरु

ताप्लेजुङ। ताप्लेजुङको दोभान बजारमा आगलागीबाट गाँसबास गुमाएका परिवारलाई राहत वितरण गर्न सुरु गरिएको छ। मेरिङदेन गाउँपालिकाले आगलागी पीडितका प्रति परिवारलाई १५ हजार रुपैयाँका दरले राहत उपलब्ध गराएको छ। त्यस्तै नेपाल रेडक्रस सोसाइटी ताप्लेजुङ शाखाले विभिन्न भाडाकुँडासहितका सामग्री र उद्योग वाणिज्य सङ्घले २० केजी चामल, नुन, तेललगायतका सामग्री वितरण गरेको छ।

ताप्लेजुङको दोभान बजारमा आगलागी हुँदा कम्तीमा ४९ घर जलेका छन्। ५६ परिवार पूर्ण र थप २२ परिवार गरी ७८ घर परिवार विस्थापित भएका निमित्त प्रमुख जिल्ला अधिकारी गायत्रा अधिकारी खड्काले बताए। मेरिङदेन गाउँपालिका ३ दोभान बजारमा जलेका घरमा सयभन्दा धेरै पसल रहेका थिए। आगोले घर तथा पसलमा क्षति गरेको छ। बजार क्षेत्रमा बीचबीचका घरहरु हटाएर दमकल, स्थानीयवासी र सुरक्षाकर्मीको सहयोगमा आगो नियन्त्रणमा लिइएको जिल्ला प्रहरी कार्यालय ताप्लेजुङका प्रहरी प्रमुख बालनरसिंह राणाले जानकारी दिए।

अन्य सम्बन्धित समाचार:  पूर्वी तराईका आदिवासीको सिरुवा पर्व कोभिडबाट प्रभावित

उक्त आगलागीपछि भएको क्षतिको विवरण सङ्कलनको काम सुरु गरिएको प्रहरी प्रमुख राणाले बताए। बस्तीबाट सुरु भएको आगो साक्फारा सामुदायिक वनमा पनि सल्किएको छ। आज बिहान नौ बजेतिर स्थानीय भोला पौडेलको घरबाट विद्युत् शर्ट भएर आगलागी सुुरु भएको अनुमान गरिएको गाउँपालिकाका अध्यक्ष गणेशबहादुर लिम्बुले बताए।