कांग्रेस नेता पौडेलको प्रश्न: ‘जनता केबल भोट मात्रै हालिराख्ने मशिन हुन् ?’

दमौली। नेपाली कांग्रेसका वरिष्ठ नेता रामचन्द्र पौडेलले देशमा नयाँ विकल्प प्रस्तुत गर्ने प्रयत्नमा कांग्रेस रहेको बताएका छन्। गृहजिल्ला तनहुँको दमौलीमा शनिवार पत्रकारसँग कुरा गर्दै वरिष्ठ नेता पौडेलले वर्तमान सरकारले जनभावना अनुसार काम गर्न नसकेकाले कांग्रेसको नेतृत्वमा नयाँ सरकार गठनको पहल थालिएको बताए।

शुक्रवार मात्रै नेपाली कांग्रेसको नेतृत्वमा ३ दलबीच भएको छलफल सकारात्मक दिशामा अगाडि बढेको वरिष्ठ नेता पौडेलले जानकारी दिए। जनता समाजवादी पार्टी (जसपा) नेतृत्वमा सरकार बनाउन कांग्रेस तयार छ? भन्ने प्रश्नमा वरिष्ठ नेता पौडेलले त्यस विषयमा आफूले अहिल्यै नबोल्ने बताए। नेकपा पार्टी एक हुँदा विगतमा केन्द्र र २ वटा प्रदेश सरकारमा अविश्वास प्रस्ताव आउँदा कांग्रेसले मौका गुमाएको बताउँदै पौडेलले भने, ‘कांग्रेसले त्यो बेला ठूलो मौका गुमायो, अब आउने मौका पनि गुमाउने हो भने टाउकामा हात राखेर बस्नुको विकल्प हुँदैन।’

अन्य सम्बन्धित समाचार:  कांग्रेस उपसभापति गच्छदारलाई पत्नीशोक

वरिष्ठ नेता पौडेलले प्रधानमन्त्री केपी शर्मा ओली र कांग्रेसकै केही नेताले चुनाव भनिरहेका सन्दर्भमा जनतालाई भोटकै लागि मात्र प्रयोग गर्न नहुने धारणा राखे। ‘जनताले भोट हालेपछि त्यसको परिणाम निस्कनुपर्छ, त्यसले उपलब्धि प्राप्त गर्नुपर्छ,’ नेता पौडेलले भने, ‘जनता केबल भोट मात्रै हालिराख्ने मशिन हुन्?’